#10212
作為一個喺dirty team返咗超過一個月工嘅護士, 我可以同大家講, 最辛苦嘅並唔係工時長、 冇得返屋企 、又或者要擔心PPE 唔夠, 而係要我對住一班當自己係皇帝嘅病人。 我明白有病係好可憐, 住隔離病房冇得探病、 所有嘢有限制係好辛苦, 但係咁唔代表各位病人可以當自己係皇帝一樣 , 對一班醫護人員呼呼喝喝 冇人想病 亦都冇人想入院 入得院的話只要你願意配合, 其實所有嘅嘢並唔係想像中咁差。 只可惜有一班好自私嘅病人, 首先已經唔理大家嘅勸告硬係要去旅行, 或者出去唱K 飲酒, 搞到自己中招。 入到院之後, 又話一定要住單人房, 又話醫院嘢食唔慣要求 畀佢叫外賣, 醫生講明幾耐抽一次血或者鼻液又要挑戰權威問究竟點解唔係日日抽, 醫生忙到瀨屎不停收緊新症又不停打出嚟問醫生點解仲未巡房, 抽完血唔夠半個鐘又即刻問出咗結果未點解咁遲。 總之醫護人員做嘅所有嘢都係錯, 好似全香港醫護人員欠咗你咁樣。 淨係叫你食藥都好似攞你命咁。 唔好講其他嘅嘢完全唔肯配合, 淨係識得喺病房入面發脾氣, 喐啲又話投訴畀報紙, 喐啲又話要搵院長。大佬, 我係咪前世欠咗你, 定係我係你殺父仇人 ? 使唔使一路醫病一路做spa 再嘆番杯香檳呀? 如果閣下覺得自己咁尊貴, 其實你大可以試下走去問私家醫院收唔收你。 人哋唔肯收你入院, 要強制喺公立醫院醫病, 唔係唔可以有要求, 而係所有要求都要合理先得㗎! 得閒無事就搵醫護人員來發洩, 乜咁樣做係啱嘅咩? 如果連咁基本嘅禮貌都冇, 我真係唔知你哋嘅父母點樣教導你。
Search